<<  DU ŜARADOJ Raymond Schwartz: La Stranga Butiko

ŜARADO

por progresintoj

Tri partojn havas mia tut',
Kaj ĉiu part' memvive staras ;
La tuto, kvazaŭ festsalut',
El nigra nokto tagon faras.

L' unua parto tre utilas
En multa senc', kaj laŭ profil'-
Aŭ fronto-vido ĝi similas
Al instrument': ĝi estas il'.

La dua vastan sencon havas,
Ĝin ne limigas neta lum',
Sed tio ĉi neniel gravas,
Ni diru nur: ĝi estas um'.

La tria estas pli preciza:
Ĝi kulpas pri la homdestin',
Pri perd' de l' lando paradiza
Kaj tiel plu ... Ĝi estas in'.

Do tiel staras la problem':
Tri partojn mia tut' entenas;
Vi ilin konas, ― nun vi mem
La nomon de la tut' divenas.