Pro peto de diversaj retanoj, la magazino MONATO cxiumonate afisxas
kelkajn tekstojn el sia nova numero. Jen prikomputila artikolo el la
junia numero.

Por akiri informojn pri MONATO aux por ricevi senpagan provnumeron, 
skribu al fel@eunet.be aux al CompuServe 100272,1601. 
======================================================================
=MONATO-teksto 004514 / Rubr.: komputado

Por lingvemaj komputilemuloj...

Esperanto-parolantoj ofte estas pli postulemaj komputil-uzantoj ol 
aliaj. Ili ja deziras uzi minimume du lingvojn. Iuj deziros 
tekstoprilaborilon, per kiu ili povas tajpi Esperanton kaj la 
finnan, aliaj volos optike rekoni tekstojn en la rusa, franca kaj 
Esperanto, kaj ankoraux aliaj deziros disig-sxablonojn por perfekte 
disigi cxe linifino vortojn en Esperanto, la ukraina kaj la 
germana. Trovi tiajn programojn estis malfacile, gxis antaux 
nelonge. Jxus aperis la tria eldono de la anglalingva The 
Multilingual PC Directory. Tiu cxi verko donas en 256 
grandformataj pagxoj tre bonan superrigardon pri cxiaj plurlingvaj 
programoj por IBM-kongruaj komputiloj kaj pri la manieroj kiel 
akiri ilin.

En la unua parto estas priskribitaj nur programoj kaj dosieroj: 
tekstoprilaboriloj, tekstoreviziiloj, tradukiloj, litertiparoj, 
programoj por adapti litertipojn, rekoniloj, programoj por adapti 
la klavaron, ktp. Kaj cxio tio por pli ol 150 lingvoj, 
inter kiuj la afrikansa kaj la albana, la cxina, korea kaj japana, 
la rusa, ukraina kaj serba, la zulua, la eskima, la nepala, kaj 
kompreneble Esperanto.

Jen nur kelkaj el la pli "ekzotaj" programoj, kiuj estas 
listigitaj: tradukprogramo araba cxina cxehxa dana esperanta finna 
franca germana hebrea hungara indonezia itala japana jida nederlanda 
norvega pola portugala rumana rusa serba svahila turka; programo 
por lerni la cxinan kaligrafion; litertipoj por la hebrea, 
malnovgreka, hieroglifa kaj japana (hiragana/katakana);
disigsxablonoj por 41 lingvoj, inkluzive la francan, kanadan 
francan kaj valonan francan...

Programoj, kiuj traktas Esperanton, ne mankas en la libro: la 
tekstoprilaboriloj 3B2 de Advent Desktop Publishing kaj The 
Universal Word de WYSIWYG Corporation; Davka Scholar, MultiWriter, 
Protext kaj WordPerfect (Cxapelilo ankoraux mankas, sed certe aperos 
en posta eldono); TrueType- kaj PostScript-litertiparoj de 
diversaj firmoj; la optika rekonilo Recognita Plus... Ne mankas 
la nomoj kaj adresoj de cxiuj liverantoj kun telefon- kaj 
faks-numeroj kaj la elektronikaj adresoj.

Dua parto en la libro traktas elektronikan komunikadon: Kie oni 
povas akiri fremdlingvajn programojn, litertiparojn, ktp. uzante 
komunikprogramojn kiel ftp, gopher, veronica aux simple 
elektronikan posxton; kie trovi prilingvajn novajxgrupojn, la 
lingvajn servojn de CompuServe, ktp.

Interesaj en la libro estas ankaux la superrigardoj de la diversaj 
normoj Latin 1 gxis 4, la diversaj kodpagxoj de IBM kaj tabelo kun 
la alfabetoj de preskaux ducent lingvoj, de la acxola en Ugando gxis la 
visajana en la Filipinoj.

Por lingvemaj komputilemuloj kaj por komputilemaj lingvemuloj tiu 
cxi verko estas vere ricxa fonto de informoj.


Ian Tresman, The Multilingual PC Directory, eld. Knowledge 
Computing, Borehamwood, 1995, 3a eldono. 256 pagxoj DIN A4, ISBN 
1-873091-03-5. Prezo cxe FEL: 1980 BEF; cxe UEA ne havebla.